Nga BoldNews.al
Ergys Verdho u emërua Drejtor i Përgjithshëm i Autoritetit Rrugor Shqiptar (ARRSH) në Tetor 2019, pas një serie konfliktesh që ndodhën brenda atij institucioni.
Por, Verdho duket se nuk ka qenë i kënaqur vetëm me pozicionin e lakmuar, i cili menaxhon dhjetra milionë euro për ndërtimin dhe rikonstruksionin e rrugëve në Shqipëri.
Vetëm pak javë pasi Ministrja e Infrastrukturës, Belinda Balluku, firmosi emërimin e tij në krye të ARRSH, Ergys Verdho regjistron në Qendrën Kombëtare të Biznesit (QKB) kompaninë “V & CE”, e cila ka për objekt të aktivitetit të saj “vlerësim pasurish të paluajtshme dhe projektim ndërtimesh”.
Pra, Drejtori i Përgjithshëm i Rrugëve, autoritetit kryesor shtetëror për ndërtimin e rrugëve në vendin tonë, përfshihet edhe në një biznes privat për projektim rrugësh.
Deri më tani nuk ka të dhëna publike për përfshirjen e shoqërisë “V & CE” shpk në tenderat e zhvilluar nga Drejtoria e Përgjithshme e Rrugëve.
Megjithatë, fakti që drejtori Verdho ka zyrë private për projektim rrugësh, është më së paku e mjaftueshme për të ngritur dyshimet mbi veprimtarinë e kreut të Autoritetit Rrugor Shqiptar.
Referuar të dhënëve zyrtare, shoqëria “V & CE” shpk është regjistruar në QKB në 4 nëntor 2019 dhe përbëhet nga dy ortakë. Njëri është Ergys Verdho me 50% të kapitalit dhe tjetri është Ndriçim Allkaj, i cili ka gjithashtu 50% të aksioneve.
Ndërkohë, rezultojnë të dhëna të tjera, të cilat e vendosin Ergys Verdhon në një tjetër situatë konflikti interesi ndërmjet detyrës zyrtare dhe aktivitetit privat.
Sipas të dhënave të publikuara prej tij në rrjetin “Linked-IN”, Ergys Verdho rezulton që të jetë emëruar fillimisht zv. Drejtor i Përgjithshëm i Autoritetit Rrugor Shqiptare në Korrik 2018.
Në periudhën Korrik 2018-Nëntor 2019 ai duket se ka qenë në kushtet e shkeljes së ligjit për konfliktin e interesit, pasi ka pasur aktiv “Personin Fizik” si “vlerësues i pasurive të paluajtshme”, biznes të cilin e ka regjistruar që në vitin 2012.
Ligji për “Parandalimin e konfliktit të interesave…” ndalon çdo zyrtar të administratës publike, aq më tepër të nivelit të lartë, ku përfshihet edhe zv.Drejtori i Përgjithshëm i Rrugëve, për të pasur aktivitet privat si “Person fizik”.
E, megjithatë, ky parashikim ligjor nuk e ka ndaluar aspak Verdhon që, gjatë kohës që ka ushtruar detyrën e zv. Drejtorit të ARRSH-së, të ushtronte edhe profesionin e ekspertit vlerësues privat.
Ai ka vijuar ta ketë aktive licensën e vlerësuesit dhe “Personin Fizik” deri në nëntor 2019, kohë kur mori emërimin si Drejtor i Përgjithshëm i Rrugëve.
