38-vjeçarja e cila denoncoi kreun e gjykatës së Gjirokastrës për favore seksuale, prej 3 vitesh dhunohet dhe kërcënohet nga ish-vjehrra.
Të paktën, kështu ka deklaruar ajo para prokurorëve të çështjes gjatë marrjes në pyetje. Ajo i ka vënë në dispozicion hetuesve urdhrat e mbrojtjes të lëshuar nga gjykata e Gjirokastrës, e cila urdhëron që vjehrra mos të afrohet pranë 38-vjeçares.
Gjatë dëshmisë së saj 8 orë, nëna e dy fëmijëve ka treguar se është lënë në rrugë nga njerëzit e bashkëshortit, duke u kthyer për të jetuar pranë prindërve bashkë me dy fëmijët për të cilët ish-bashkëshorti nuk paguan edhe pensionin ushqimor.
Nga ana tjetër mësohet se 38-vjeçarja i ka treguar hetuesve takimet me kryetarin e gjykatës, tashmë të shkarkuar nga detyra dhe pezulluar edhe nga puna si gjyqtar. Ajo i ka thënë prokurorëve se e kishte takuar për t’i kërkuar ndihmë dhe të sqaronte se çfarë rrugë të ndiqte për të siguruar banesën për fëmijët. Por, gjatë këtyre takimeve, 38 vjeçarja ka treguar se ai e provokonte dhe ka kërkuar favore seksuale për ta ndihmuar.
Nëna e dy fëmijëve ka pranuar se është takuar me gjyqtarin e pezulluar Guximtar Boçi jo vetëm në lokal, por edhe në zyrën e tij të punës. Në këto takime, ka thënë nëna e dy fëmijëve Boçi insistonte të krijonte një lidhje intime në shkëmbim të ndihmës në gjykatën e shkallës së parë dhe atë të apelit.
E dëmtuara ka pretenduar gjatë dëshmisë se për shkak se nuk kishte pranuar lidhjen me kryetarin e gjykatës, ky i fundit kishte ndërhy te gjyqtarja e çështjes që të jepte vendimin kundër saj. Vendim ky që më pas është lënë në fuqi edhe në Gjykatën e Apelit në Gjirokastër në favor të familjarëve të ish-bashkëshortit të 38-vjeçares.
Burimet nga Akuza, i thanë ABC News se në Gjirokastër, veç pyetjes së nënës së dy fëmijëve që jetonte te prindërit e saj, janë sekuestruar edhe dosjet material që ndodheshin në Gjykatë.
Si vendimet e urdhër-mbrojtjes ashtu edhe vendimet civile, të divorcit, të pretendimit të pronës si dhe kopja e kallëzimit që ndodhet në prokurori, për kontratën fiktive që pretendon 38-vjeçarja që e kanë bërë me ish-vjehrrën e saj, që është përdorur për ta larguar atë nga banesa bashkë me dy fëmijët. / ABC News/
