Shqipëria luan më 11, 15 dhe 18 nëntor kundër Kosovës, Kazakistanit dhe Bjellorusisë. Ndaj “Dardanëve” do të jetë një takim miqësor, ndërsa dy takimet e tjera janë të vlefshme për Ligën e Kombeve.
Trajneri Edy Reja ka shpallur listën e lojtarëve që do të ketë në dispozicion, gjatë konferencës për shtypin që organizon Federata Shqiptare e Futbollit. Ai ka folur për objektivat që do të ketë skuadra në këto takime si dhe pë skemën që pritet të përdorë në fushën e lojës.
Objektivat- “Donim të merrnim 4 pikë në dy ndeshjet e fundit, por morëm vetëm dy. Kishim raste, por nuk shënuam. Për dy takimet e radhës, objektivi është t’i fitojmë pavarësisht problemeve që kemi me lojtarët. Synojmë vendim e parë dhe i kemi mundësitë t’i marrim pikët e duhura. Do japim maksimumin”.
Skema- “Edhe mund të ndodhë që të ndryshojë. Nëse do të kemi mungesa në mbrojtja, mund të lëvizim. Varet nga lojtarët që do të kemi në dispozicion. Nëse ndonjë nuk vjen për shkak se bllokohen nga klubet. Veseli, Ismajli dhe Gjimshiti kanë dhënë “OK”, Trashi është në pikëpyetje.”
“Për Hysajn duhet të presim, kurse Gjasulën mund të mos e llogaritim për Kosovën. Skema bëhet nga trajnerit, por varet nga lojtarët. Moduli ka funksionuar, por nuk kemi shënuar. Dua që të dalim sa më shumë nga krahët. Kam përdorur shumë module, por duhet kohë. Lojtarët janë përshtatur me 3-5-2 dhe më janë përgjigjur mirë. Shqetësimi im është që të kem të gjithë lojtarët në dispozicion.”
