Që kur nisi pandemia ka pasur shumë raportime për Covid e gjatë, kur pacientët vuajnë simptomat e sëmundjes për muaj me radhë pas infektimit.
Studiuesit po vëzhgojnë mushkëritë e pacientëve të vdekur nga Covid-19, që mund të hedhë dritë, se pse disa njerëzve u duhen disa muaj për t’u shëruar. Gjatë vëzhgimeve të tyre, studiuesit identifikuan dëmtime të vazhdueshme dhe të mëdha të mushkërive, raporton Reuters.
Sipas Mauro Giacca, profesor në King’s College London tha se zemra, mëlçia dhe veshkat e pacientëve të vdekur nuk kishin asnjë shenjë të dukshme të infeksionit viral ose inflamacionit të zgjatur. Por në mushkëri, ata gjetën shkatërrim vërtet të madh të strukturës së tyre. Çdo ind i shëndetshëm i mushkërive ishte plotësisht i zëvendësuar nga një cipë e hollë.
“Edhe nëse dikush shërohet nga Covid-19, dëmi që bëhet mund të jetë masiv.”- thotë profesori.
Për më tepër, Giacca tha se shumë lloje qelizash te pacientët e vdekur ishin infektuar me SARS-CoV-2, virusi që shkakton Covid-19.
“Prania e këtyre qelizave të infektuara mund të shkaktojë ndryshime të mëdha strukturore në mushkëri, të cilat mund të vazhdojnë për disa javë ose muaj dhe përfundimisht shpjegojnë Covid-in e gjatë.”- tha ai.
Hulumtimi ndjek një studim të veçantë që identifikon faktorët e rrezikut që do të rrisnin mundësinë që një pacient të vuante nga Covid i gjatë. Për shembull, studiuesit zbuluan se në mesin e pacientëve me virus, simptomat e zakonshme si lodhje, dhimbje koke, dispnea e anosmi, kishin më shumë të ngjarë të shfaqeshin te pacientët e moshuar, ata me indeks të lartë të masës trupore dhe te femrat. Po ashtu nëse vuani nga më shumë se 5 simptoma gjatë javës së parë të diagnostikimit, vuani edhe nga Covid i gjatë.
