Kryeministri i Kosovës, Isa Mustafa, e ka konsideruar ditë të shënuar për të gjithë shqiptarët miratimin nga Papa Françesku te dekretit përfundimtar për shenjtërimin e Nënës Terezë më 4 shtator 2016.
Në një status në faqen e tij ne Facebook mbrëmjen e te martës Mustafa, shprehet: “Sot është një ditë e shënuar për shqiptarët dhe për të gjithë njerëzit e vullnetit të mirë anekënd botës. Miratimi nga Papa Françesku i dekretit përfundimtar për shenjtërimin e Nënës Terezë më 4 shtator 2016, është vlerësim i merituar për Nënën e madhe shqiptare, e njëkohësisht është nder i jashtëzakonshëm për popullin tonë”.
“Ne, sot jemi krenarë që nga gjiri i popullit tonë doli Nëna Terezë, e cila me jetën, përkushtimin dhe sakrificën e saj mbresëlënëse, u bë simbol global i humanizmit dhe dashurisë për njeriun, u bë shenjtëreshë e botës mbarë. T’i falemi Nënës tonë të madhe Gonxhe Bojaxhiut! IM”, shkruan Mustafa.
