Greqia vendos karantinën kombëtare deri më fund të muajit Nëntor. Njoftimi u bë këtë të Enjte nga kryeministri grek Kyriakos Mitsotakis dhe specialisti i sëmundjeve infektive, Sotiris Tsiodras.
“Ne kemi marrë vendimin që nga e Shtuna në mëngjes në 06:00, të pezullojmë aktivitetet deri më 30 nëntor”, deklaroi Sotiris Tsiodras.
“Një ndryshim i rëndësishëm krahasuar me marsin dhe prillin është që kopshtet dhe shkollat fillore do të jenë të hapura. Gjimnazet dhe shkollat e larta do të mbyllen. Dallimi i madh është se tani përdorimi i një maske është padyshim universal në të gjitha lëvizjet”, tha kryeministri grek, i cili, duke iu përgjigjur pyetjes “Pse tani?”, tha: “Përgjigja është shumë e qartë. Në 5 ditët e fundit kemi parë një rritje eksponenciale të rasteve. Pothuajse 10,000 raste në 5 ditë. Ne pamë një rritje të konsiderueshme të shtrimeve në spital, të pacientëve të intubuar”.
“Ne duhet ta ndalojmë këtë valë”, theksoi Mitsotakis.
Kryeministri deklaroi se për nëntorin, pagesa për ndërpretjen e aktivitetit të punës që do të jepet do të jetë 800 euro dhe jo 543, përveç “dhuratës së Krishtlindjes”.
Në të njëjtën kohë, një rritje e vetme prej 400 euro do t’u jepet të papunëve afatgjatë.
Kryeministri theksoi se kopshtet dhe shkollat fillore do të qëndrojnë të hapura, si dhe shkollat speciale. Përveç kësaj, supermarketet, farmacitë, objektet shëndetësore mbeten të hapura, ndërsa kthehen sms-të për lëvizjen e qytetarëve.
