Kryetarja e LSI-së, Monika Kryemadhi ka zhvilluar një takim në Durrës këtë të Enjte, me banorë, banesat e të cilëve u prekën nga tërmeti i Nëntorit të vitit të kaluar.
Kryemadhi u shfaq pa maskë në takimin me banorë. Aty, mbërritën efektivë të policisë së shtetit të cilët lajmëruan kryetaren e LSI-së se do të gjobitet për mos mbajtjen e maskës.
Përveç Kryemadhit, efektivët njoftuan gjobitjen edhe për anëtarë të tjerë të LSI-së, që shoqëronin në këtë takim kryetaren e kësaj force politike.
Kryetarja e LSI-së u pa teksa filmonte fletën e gjobës. “Do t’ja çjerrim maskën Edi Ramës më 25 Prill. Shqipëria, shtëpia e shqiptarëve”, shkroi Kryemadhi në fletën e gjobës.
Edhe dje, në media u raportua se Kryemadhi u gjobit për mos mbajtje të maskës në Kombinat. Por, LSI, në një reagim, Kryemadhi u shpreh se nuk e kishte ndaluar asnjë efektiv policie dhe s’kishte dijeni për gjobën.
Me aktin e ri normativ, mbajtja e maskës dhe në ambiente të hapura është bërë e detyrueshme, që prej 15 Tetorit.
