NGA LËVIZJA PËR UNIVERSITETIN
Ministria e Arsimit dhe Sportit po e normalizon dështimin e saj. Pasi ndryshoi disa herë Udhëzimin 13, kur u vendos përballë akuzave, fshiu Udhëzimin 24 nga faqja e saj zyrtare. Më tej u mor vesh që nxori një Udhëzim 24/1, i cili nuk u publikua kurrë në faqen e saj zyrtare. Ky udhëzim e shtynte regjistrimin deri në datën 27 tetor.
Ditën e djeshme doli në media njoftimi që MAS-i e ka shtyrë sërish regjistrimin deri në datën 1 nëntor. Në faqen zyrtare të MAS nuk është e mundur të gjendet asnjë dokument që siguron saktësinë ligjore të tij. Nga verifikimet në terren është konstatuar se regjistrimi maturantëve po vijon edhe pas datës 27 tetor.
Jemi të ndërgjegjshëm që ky kaos i jashtëzakonshëm në skemën e regjistrimit, me pasoja të rënda në sistemin e meritës dhe preferencës (përjashto raundin e parë të regjistrimeve) është i pamundur të zhbëhet pa e futur krejt jetën universitare në kolaps. Mirëpo për hakun e ngrënë të mijëra maturantëve, të degdisur pa e merituar në diplomore private dhe degë të papreferuara, së paku ministrja Nikolla duhet të japë dorëheqjen.
Në Shqipëri nuk është parë kurrë as shkarkimi dhe as dorëheqja e një ministri për arsye gabimesh trashanike dhe paaftësie të gjithanshme në kryerjen e detyrës.
Ju, znj. Nikolla, për ne, studentë e pedagogë, por edhe për sa e sa prindër e qytetarë të shqetësuar, jeni tërësisht e paaftë për të drejtuar arsimin shqiptar.
Ju, znj. Nikolla, meritoni të shkarkoheni. Por kryeministri Rama s’ka për ta bërë kurrë këtë, se bashkë me ju do të shkarkonte publikisht edhe krejt reformën klienteliste dhe shkatërrimtare në arsimin e lartë. Ndaj bëjini nder vetes dhe dorëhiquni një orë e më parë!
#NikollaDorëhiqu
