Një 15-vjeçar në Sarandë është plagosur me thikë nga një bashkëmoshatar.
Adoleshenti është transportuar në spital dhe ndodhet jashtë rrezikut për jetën. Ndërkohë, autori është shoqëruar nga uniformat blu.
Policia sqaroi se “rreth orës 15:00, në urgjencën e spitalit të Sarandës, është paraqitur për ndihmë mjekësore shtetasi K.T., 15 vjeç, banues në Sarandë, i cili dyshohet se është goditur për motive të dobëta, me mjet prerës (thikë) nga një bashkëmoshatar i tij. Policia ka shoqëruar në ambientet e Komisariatit të Policisë Sarandë, autorin e ngjarjes, shtetasin E. Ç., 15 vjeç”
Policia shton se ka sekuestruar në cilësinë e provës materiale mjetin prerës. Ndërkohë, shtetasi K.T., aktualisht, ndodhet në spitalin rajonal Sarandë, jashtë rrezikut për jetën.
“Vijon puna e grupit hetimor për sqarimin e plotë të rrethanave të ngjarjes”, thuhet në njoftimin paraprak të uniformave blu, për ngjarjen.
