Kryeministri Edi Rama nuk tërhiqet për ndërtimin e HEC-eve në Luginën e Valbonës. Edhe pse shoqëria civile dhe banorët vazhdojnë protestat prej muajsh, Rama ka deklaruar sot në Parlament se të paktën “2 HEC-e do të ndërtohen mbi këtë lumë”.
Duke u justifikuar se Berisha kishte dhënë leje për ndërtimin e 11 të tillëve, Rama tha se ka anuluar ndërtimin e 9 HEC-eve.
“Po ju sqaroj se kemi mbajtur rigorozisht në vëmendje dhe procedurën për Valbonën dhe dy HEC vetëm 2, jo 11, të cilat kanë marrë dritën jeshile për shkak pamundësie të plotë ligjore për të bërë anulimin janë kaluar në filtra njëri pas tjetrit për të garantuar me ekspertizë ndërkombëtare standarde mjedisore dhe cilësi projektimi inxhinierik të njëjtë me ata që vazhdojnë të ndërtohen në Evropën e veriut”, tha Rama.
Kryeministri iu është drejtuar edhe qytetarëve duke synuar që ata të mos protestojnë.
“Për publikun po sqaroj se kur dëgjoni fjalën hidrocentrale në Valbonë, mos parafytyroni diga. Nuk do të ndërtohen diga. Nuk do ndërtohen strukturat që secili i imagjinon kur flitet për një hidrocentral sepse teknologjia e përdorur është krejt tjetër, dhe peizazhi është krejtësisht i pacenuar”, tha kryeministri dy ditë para koncert-protestës që organizohet të shtunën në Valbonë, ku marrim pjesë artistë të njohur si Elina Duni, Eda Zari, etj.
