Areti Beruka, kryeinspektore për shëndetin në Tiranë ka rezultuar pozitive me Covid-19. Beruka është një prej 288 rasteve që kanë rezultuar të infektuar me koronavirus gjatë 24 orëve të fundit në Shqipëri.
Ajo ka marrë përgjigjen e tamponit dhe është karantinuar në banesë. Raportohet se Beruka ka shfaqur simptoma të lehta dhe ndodhet në gjendje të mirë shëndetësore.
Areti Beruka, kryeinspektore për shëndetin në Tiranë, u lakua në media në fillimet e pandemisë, pas deklaratave që bëri. Ajo ishte e para që tha publikisht se mezi priste që të infektohej me Covid-19 personi i parë në Shqipëri. Sipas Berukës, për një mjek, kjo gjë ishte me rëndësi: të studiosh dhe të kesh në duar gjëra të reja.
Më pas, në një tjetër deklaratë në media, kryeinspektorja tha se do të ishte mirë që 60-% e popullsisë të infektohet nga koronavirusi, në mënyrë që të krijohet ‘mbrojtja e tufës’.
