Humbjen ndaj Cadiz në La Liga, Real Madrid e ka pasuar me një tjetër disfatë këtë herë në Ligën e Kampioneve.
Shakhtar Donetsk ka arritur t’i mundë “Los Blancos” brenda në shtëpi me rezultatin 2-3. Pjesë e parë katastrofike për ekipin e Zinedine Zidane, që pëson tre gola nga ukrainasit në çerekorëshin e fundit.
Tre gola brenda 13 minutave për miqtë, të cilët i falën rrjetave të brazilianit Tete dhe izraelitit Solomon. Në mes të tyre erdhi edhe autogoli i Raphaël Varane. Pushimi dhe ulërimat e Zidane, i bënë mirë vendasve, por disfata nuk u evitua dot.
Luka Modric realizoi një gol fantastik në minutën e 54-t, teksa pesë minuta më pas erdhi edhe rrjeta e Vinicius Junior. Sulmet e Realit nuk u ndalën dhe në minutat shtesë erdhi goli i barazimit. Federico Valverde dërgoi topin në rrjetë, por VAR-i e anuloi për pozicion të parregullt.
