Autoritetet doganore shqiptare, edhe pse me një rritje të të ardhurave me 2.7% krahasuar me vitin e kaluar, nuk kanë arritur të përmbushin sërish planin e nëntëmujorit të këtij viti.
Sipas të dhënave zyrtare nga Doganat, mësohet se për periudhën janar-shtator janë grumbulluar 109.1 miliardë lekë, nga 112.3 miliardë që ishte plani.
Hendeku i krijuar në raport me planin është 3.2 miliardë lekë, ose rreth 23.3 milionë euro në të gjithë periudhën 9-mujore. Siç shihet nga të dhënat, Doganat nuk e kanë realizuar planin në mënyrë sistematike që nga muaji maj, përveçse në shkurt, mars dhe prill.
Të dhënat tregojnë se volumet e importeve i kanë favorizuar doganat. Gjatë periudhës në fjalë, volumi total i importeve është rritur me mbi 9%. Nga 409,9 miliardë lekë mallra që janë importuar në vitin 2015, në nëntëmujorin e këtij viti kanë hyrë në Shqipëri 448,1 miliardë lekë importe.
Me rritje kanë qenë edhe importet e taksuara me rreth 8.9% më shumë se në nëntëmujorin e 2015-s.
Por në shtator, mbledhja e të ardhurave nga doganat shihet të jetë përkeqësuar ndjeshëm. Sipas të dhënave, shihet të jenë mallrat e akcizës të cilat kanë pësuar një rënie të fortë të importeve.
Importet e karburanteve në muajin shtator ishin 30% më të ulëta se të muajit gusht dhe më të ulëtat e këtij viti, ndërsa importet e cigareve ranë me 10% në shtator në krahasim me gushtin. Në rënie janë dhe importet e birrës dhe kafesë. /Monitor/
