Një ditë pasi u vendos shtetrrethimi në 9 qytete, Franca në 24 orëshin e fundit ka regjistruar mbi 30 mijë raste të reja të prekurish, një shifër e cila nuk ishte shënuar as në fillimet e pandemisë. Për këtë arsye Organizata Botërore e Shëndetësisë ka bërë thirrje që autoritetet franceze të marrin masa edhe më të forta pasi spitalet shumë shpejt mund t’i afrohen kolapsit. Aktualisht vetëm 9 qytete përfshirë Parisin, Tuluzën, Marsejën etj, janë vendosur nën izolim total pasi aty janë identifikuar rastet edhe më të shumta.
Rekord infektimesh ka patur edhe Italia, ku në një ditë janë regjistruar 8840 raste ndërkohë që numri i viktimave është dyfishuar nga 43 në 83 brenda një dite. Zonat më të prekura nga infektimet janë Lombardia e ndjekur nga Campania dhe Piemonte. Po ashtu infektime të larta janë identifikuar edhe në jug të Italisë në Napoli.
Spitalet në të gjithë Çekinë i kanë shtyrë operacionet që nuk janë urgjente dhe kanë vendosur shtretër shtesë për shkak të rritjes së numrit të pacientëve me Covid-19. Qeveria çeke ka deklaruar se kapaciteti i plotë spitalor mund të mbushet rreth fundit të Tetorit.
Në Gjermani u kufizuan oraret e qëndrimit hapur të bareve dhe restoranteve në zonat e prekura. Rusia regjistroi numrin e saj më të lartë të viktimave ditore që nga fillimi i epidemisë ku 286 persona humbën jetën nga Covid-19. Vendet europiane bëhen të parat të cilat vendosin një izolim të pjesshëm.
Teksa Shtetet e Bashkuara të Amerikës vijojnë që të mbajnë rekord global për numrin e të infektuarve dhe viktimave, të dy kandidatët për presidentë vijojnë që të zhvillojnë fushatë pa asnjë masë, ku maskat dhe distancimi fizik nuk respektohen. Donald Trump ishte i pranishëm në Pensivalni dhe në Karolinën e Veriut, ku ajo që u vu re ishte fakti se mbështetësit e kalonin numrin 1 mijë një gjë kjo e cila është kundrejt rregullave të përcaktuara nga autoritetet shëndetësore.
Dy rivalët folën në dy takime të ndryshme me pyetje-përgjigje nga votuesit, që u mbajtën dhe u transmetuan njëkohësisht në rrjete të veçanta televizive, pasi një debat i planifikuar fillimisht para dy javëve u anulua pasi Trump rezultoi me Covid-19. Të dy akuzuan njëri-tjetrin për pandeminë e koronavirusit.
Rivali demokrat Biden, duke folur para votuesve në Filadelfia në televizionin ABC, fajësoi presidentin republikan se e kishte mbajtur të fshehtë se sa vdekjeprurës ishte virusi që ka infektuar gati 8 milionë njerëz në Shtetet e Bashkuara. Presidenti Trump mbrojti punën e administratës për pandeminë, e cila deri më tani ka zbatuar me rigorozitet të gjitha masat.
