Kampionia në fuqi e Kategorisë Superiore, Tirana, ka konfirmuar ndeshjen e radhës miqësore, këtë herë kundër Besës së Kavajës.
Takimi do të zhvillohet ditën e nesërme në stadiumin “Selman Stërmasi” duke filluar nga ora 16:00. Skuadrat e Superiores aktualisht po përgatiten për startin e sezonit që sipas kalendarit duhej të kishte startuar 6 javë më parë.
Por 4 kërkesat e Ligës Profesioniste të futbollit ndaj qeverisë, të nënshkruara nga të gjitha klubet e elitës shqiptare, kanë bërë që starti i sezonit të mos ketë akoma datë zyrtare.
Gjithsesi pas një takimi të fundit të Ligës Profesioniste dhe një grupi negociatorësh të qeverisë, raportohet se rikthimi i futbollit në normalitet është pranë.
