Ditën e enjte hyn në fuqi vendimi i kryeministrit Edi Rama për të detyruar mbajtjen e maskës edhe në ambjente të hapura, përjashtuar këtu baret dhe restorantet.
Për të folur mbi këtë temë, e ftuar në Ora News përballë gazetares Matilda Mcini ishte zv.ministrja e Shëndetësisë dhe shefja e Task-Forcës anti-Covid, Mira Rakacolli.
Sipas saj, duke parë rritjen e infektimeve në Botë dhe Europë, u vendos edhe përdorimi i detyrueshëm i maskës në çdo ambjent.
“Jemi përpara një kohe kur në të gjithë botën janë rritur ndjeshëm infektimet nga Koronavirusi. Janë rritur në Amerikë, janë rritur në Europë, janë rritur në Europë. Ne përditsohemi për ditë dhe media jep shifrat në rritje për ditë.
Fatmirësisht, në Shqipëri, për momentin nuk kemi rritje të mëdha por mbetet ajo kurba me rritje të lehtë dhe të qëndrueshme. Duke patur parasysh që po vjen vjesha dhe dimri dhe që nuk e dimë si do sillet ky virus, mendohet që do të ketë një shtim, nuk e dimë a do të jetë e vërtetë, ne duhet të përpiqemi ta përballojmë sa më mirë.
Për faktin që akoma nuk ka një mjekim specifik, akoma nuk ka dalë vaksina, e vetmja mënyrë mbetet parandalimi. Dhe në mjetet e parandalimit, vendosja e maskës është tashmë e provuar që është mjaft efikase”, u shpreh Rakacolli.
Drejtuesja e Task-Forcës shtoi se, përdorimi i maskës nuk po vendoset tani për herë të parë.
“Maska nuk është vendosur për herë të parë tani. Është vendosur sipas situatës epidemiologjike dhe shifrave, në momente të ndryshme. Që kur filloi strategjia e rihapjes u këshillua maska në disa ambjente Tani, për faktin që numrat kudo në botë dhe rajon po shkojnë në rritje, mendojmë që për të parandaluar akoma më shumë infeksionin do të jetë e nevojshme vendosja e maskës në të gjitha ambjentet”, shtoi zv.ministrja e Shëndetësisë.
Sipas Rakacollit, “ky vendim është marrë bazuar në studime të rëndësishme”.
Pak ditë më parë, kryeministri Edi Rama, në një konferencë shtypi përkrah ministres së Shëndetësisë, njoftoi se duke nisur nga kjo e enjte, përdorimi i maskës edhe në ambjente të hapura bëhet e detyrueshme.
Sipas tij, të gjithë shkelësit do e paguajnë gjobën përmes faturës së energjisë elektrike.
Ndërsa sot, ishte drejtori i përgjithshëm i Policisë së Shtetit Ardi Veliu, i cili paralajmëroi qytetarët se, patrulla të uniformave blu do të jenë në terren dhe nuk do të ketë tolerime për askënd. /Oranews
