Inspektori i Lartë i Drejtësisë, Artur Metani, vlerëson se procedimi disiplinor ndaj magjistratëve duhet të zhvillohet në ekuilibër, midis interesit publik, respektimit të të drejtave të individëve dhe parimit të gjykimit të drejtë e ndarjes së pushteteve.
Këto komente, Metani i bëri këtë të Enjte, në një takim mbi “Praktikat e Gjykatës Europianë të të Drejtave të Njeriut (GJEND) mbi çështjet disiplinore të magjistratëve”.
Metani e konsideron praktikën gjyqësore të GJEND si shumë të rëndësishme për kontekstin shqiptar, sidomos pas krijimit të një sërë institucionesh të reja, pas miratimit të Reformës në Drejtësi.
Vendimet e gjykatës ndërkombëtare, dhe sidomos parimet e tyre, mund t’u shërbejnë institucioneve shqiptare, përfshirë Inspektorin e Lartë të Drejtësisë, Këshillin e Lartë Gjyqësor dhe Këshillin e Lartë të Prokurorisë për koordinimin e veprimtarisë institucionale dhe rritjes së kapaciteteve të stafeve të tyre.
Metani, i cili më herët nga mbajtur postin e Avokatit të Shtetit, është i mendimit se, pavarësisht se pjesa më e madhe e akteve ligjore mbështeten në Konventën Europiane të të Drejtave të Njeriut, sfidë mbetet zbatimi efektiv dhe real në praktikë i normave të njohura dhe pranuar ndërkombëtarisht.
Inspektori i Lartë i Drejtësisë (ILD) është një institucion kushtetues, i cili ka nisur aktivitetin e tij në Janar të vitit 2020, pasi Parlamenti zgjodhi juristin Artur Metani si drejtuesin e parë të kësaj strukture.
ILD ka përgjegjësinë për verifikimin disiplinor të të gjithë magjistratëve në Republikën e Shqipërisë. Rezultatet e punës së tij, më tej, shqyrtohen nga Këshilli i Lartë Gjyqësor (KLGJ) për gjyqtarët dhe Këshilli i Lartë i Prokurorisë (KLP) për prokurorët.
Përgjatë vitit 2020, sipas informacioneve zyrtare, Inspektori i Lartë i Drejtësisë ka nisur procedurat verifikuese për disa magjistratë, ndërkohë që për dy prej tyre, një gjyqtar dhe një prokuror, ka përcjellë raportet përfundimtare pranë KLGJ e KLP.
/BoldNews.al/
