Shqyrtimi i mandatit të tij nga Gjykata Kushtetuese, e ka shqetësuar jo pak deputetin Koço Kokëdhima.
Ai ka qenë i tensionuar në mbledhjen e grupit parlamentar të PS dhe i ka kërkuar llogari Gramoz Ruçit se përse nuk ishte njoftuar më parë që dërgimi i mandatit të tij në Kushtetuese do të votohej të enjten e kaluar në parlament. “Më keni lajmëruar vetëm 15 minuta përpara”, ka thënë Kokëdhima.
Gramoz Ruçi ka shpjeguar arsyet duke thënë se çështja në fjalë hyn automatikisht në seancë.
Deputeti i Jugut ka thënë se duke mos patur dijeni se do të votohej për rastin e tij, ai nuk kishte mundësi të fliste dhe të mbrohej si duhej në foltoren e Kuvendit.
Megjithatë, javën e fundit, Kokëdhima, i cili nuk para del në media, po bën përpjekje për t’u shfaqur në ekrane e gazeta për të shpjeguar rrethanat e akuzave ndaj tij përpara se Gjykata Kushtetuese të marrë një vendim. Ai ishte të hënën e kaluar në Oopinion, ndërsa këtë të hënë kishte pushtuar studion e Ilva Tares për të dhënë hollësi për kontratat dhe pagesat që kompanitë e tij private kanë patur me institucionet publike. Kokëdhima, ndryshe nga sa e akuzon opozita, pretendon se këto marrëdhënie financiare janë ndërprerë në momentin që ai ka marrë mandatin e deputetit, më 2 gusht 2013.
Çështja e mandatit të Kokëdhimës u votua të enjten e kaluar në Parlament për t’i kaluar Gjykatës Kushtetuese, e cila do të vendosë nëse do t’i hiqet mandati i deputetit apo jo. /lapsi.al/
