Nga Boldnews.al
Shfaqja ishte përgatitur më parë në zyrat e Rilindjes. Në fillim u shkrua skenari, u përzgjodh “kasta e autorëve” dhe në fund regjisori nisi xhirimet dhe në dy orë, doli një shfaqje që për publikun u servis si një “kryevepër” e Edi Ramës. Në të vërtetë ndryshimet e njëanshme të Kodit Zgjedhor patën një fund i cili pritej.
Në fillim Rama tentoi të shpjegonte se përse e mori këtë nismë, më pas dikush duhet të kundërshtonte, gjoja në emër të “opozitarizmit” dhe mbrojtësit e votës qytetare dhe në fund votimi ishte i paracaktuar edhe se cilët deputetë do bënin rolin e “nevrikut”, kush do i binte më grusht foltores, cili do të hiqej si kapo që mund të “rrihte” diamantin e Ramës, Damian Gjiknurin, madje edhe përfaqësuesit e Gardës së Republikës ishin trajnuar që gjoja të ndërhynin për shuarjen e sherrit.
Rama këtë herë nuk e luajti “filmin” vetëm me aktorë Rilindas, por edhe personazhe të tjerë që kanë nisur ti pëlqejnë skenarët e kryeministrit tonë dhe, është “producent” që paguan mirë… Muirrizi, Beqiri dhe Hajdari pranuan të ishin pjesë e “kastës Rama”, duke
bërë në fillim prova që të ishin sa më të përgatitur në xhirimet e fundit.
Deputetja Rudina Hajdari ishte më e emocionuara, pasi i duhet të kishte rol protagonist në filmin “Rama”, ndërsa xhirimet kryheshin brenda sallës së parlamentit. Me gjeste dhe gjestikulacione dhe një oratori të mësuar përmendësh, Rudi arriti të lërë mbresa. Shfaqja brenda sallës u mbyll dhe më pas kamerat (si për çudi ishin nga një tv pranë Ramës) u fokusuan tek sherri “Beqiri-Damiani”…
Ai duhet të shkonte si i fortë, si i verikosur, ndërsa Damiani të shfaqej i patrembur, por të dukej sa më i qetë, në fund të fundit “regjisori Rama” e ka aktorin e tij të preferuar Damianin dhe nuk mund të lejonte që ai të dilte si frikacak, përkundrazi të jepte imazhin e një sypetriti.
Ndërsa Rudina dhe Beqiri e realizuan rolin e tyre, një personazh futet ngado, ai ishte Lymi, një aktor i vjetër, por deri më tani në role episodike. Gjithnjë me atë zërin e çjerrë karakteristik pati për detyrë të bënte një lloj zhurmuesi, që në filmat e Edi Ramës janë thuajse gjithnjë të pranishëm.
Shfaqja mbaroi, në fund u miratua një kod zgjedhor i cili megjithë këto kapërcime, ngjan si kodi i mafies, ku për të arritur një qëllim, mjeti i dhunës dhe propagandës është domosdoshmëri për qeverinë Rama, pavarësisht se pasojat bien mbi qytetarët.
Sa për deputetët e vëtëshpallur opozitarë, kjo është prova e radhës sesi votojnë çdo nismë të qeverisë, duke u kthyer me dëshirën e tyre në personazhe që kanë hyrë në histori si individë me probleme të theksuara intelektuale dhe mbi të gjitha morale përsa i përket nismave politike.
