Nga BoldNews.al
Në një rrëfim me nota entuziaste, aktori Robert Ndrenika tregoi në Korrik 2020 se kishte mbetur i kënaqur, pasi kishte parë skicat e projektit për ndërtimin e Teatrit të ri Kombëtar.
Në një mesazh, të shpërndarë me shpejtësi nga zyra e shtypit e Bashkisë së Tiranës dhe e përhapur menjëherë në mediat pro-qeveritare, Ndrenika citohej të përmendte ndër të tjera: “Dje më thirrën regjisori Altin Basha, drejtori i teatrit, Hervin Çuli dhe inxhinier Bejleri, në një zyrë arkitekture dhe pashë skicat dhe projektin e ndërtimit të teatrit të ri. U kënaqa shumë…”
Mesazhi i Ndrenikës kishte një detaj jo fort të përshtatshëm. Ai foli për skica të gatshme, ndërkohë që tenderi për studimin dhe projektimin e Teatrit të ri sapo ishte shpallur.
Gjithashtu, Ndrenika përmendi edhe se, në takim, ishte edhe “inxhinjeri Bejleri”, pa dhënë më shumë detaje për këtë person.
Të ishte vallë E. Bejleri, pronar i kompaninë “S….”, dhe, sipas raportimeve mediatike, mik me përgjegjësin e medias së kryeministrit, Endri Fuga, si edhe me zyrtarin e lartë bashkiak, Ditjon Baboçi?
Nuk ka të dhëna zyrtare për të vërtetuar plotësisht nëse “Bejleri” në takimin me Ndrenikën ishte E. Bejleri.
Megjithatë, emri i këtij të fundit është përmendur shpesh në media kohët e fundit, për fitimin e tenderave në vlerë disa milionë euro, të fituar në Bashkinë e Tiranës, në bashkëpunim me kompaninë “A & E Engineering”.
Dhe kjo e fundit rezulton se është fituese e tenderit për Studimin dhe Projektimin e Teatrit të ri Kombëtar.
Bashkia e Tiranës ka publikuar së fundmi rezultatet e tenderit me vlerë rreth 600 mijë dollarë, një procedurë e shpallur pas shkatërrimit me procedura tejet të dyshimta që i bëri godinës historike në Maj 2020.
Fitues është shpallur bashkimi i përbërë nga kompania shqiptare “A & E Engineering” dhe ajo italiane “FM Ingegneria SPA”.
Vlerë e paraqitur nga fituesi është më e lartë se konkurenti tjetër në garë, “Gjeokonsult & CO” shpk & “Archispace”, i cili u skualifikua për shkak të mos-plotësimit të kritereve, sipas të dhënave zyrtare.
Operatori i skualifikuar ankimoi vendimin fillimisht pranë Bashkisë së Tiranës. Komisioni përkatës vlerësoi se duhet të mbetej në fuqi vendimi për eleminimin e saj nga gara.
Gjeokonsult & CO” shpk & “Archispace” u ankua më pas në Komisionin e Prokurimit Publik (KPP). Ky institucion vendosi të mos merrte në shqyrtim rastin, pasi, sipas përllogaritjeve, ankimi ishte dorëzuar përtej afatit ligjor.
Tenderi për studim-projektimin e Teatrit të ri Kombëtar u shpall në Korrik 2020, dy muaj pasi fadromat e Bashkisë e rrënuan godinën 70-vjeçare nën protestat e forta të komunitetit të artistëve.
Tenderi zbuloi gjithashtu se Bashkia e Tiranës, e drejtuar nga Erion Veliaj, nuk kishte asnjë plan konkret për ndërtimin e Teatrit të ri në momentin kur vendosën që të përdornin mjetet e rënda.
E vetmja gjë që dihej deri në atë moment ishte se Teatri i ri Kombëtar do të ishte pjesë “integrale” e një kompleksi gjigand kullash private.
