Presidenti Ilir Meta ka folur për situatën në Kirgistan. “Pas protestave popullore në Kirgistan, Komisioni Shtetëror i Zgjedhjeve mori vendimin për anulimin e zgjedhjeve parlamentare të zhvilluara së fundi në Kirgistan dhe vendosi përsëritjen e tyre në një kohë të afërt”, shprehet kreu i shtetit.
“Me këtë rast, dëshiroj të përshëndes popullin kirgiz për guximin e treguar në denoncimin e parregullsive masive, veçanërisht atë të blerjes së votave nga forca pranë pushtetit, si dhe në përballjen me cënimin e rëndë që ju bënë lirive e të drejtave themelore të tij, duke i mohuar të drejtën për zgjedhje të lira e demokratike. Qytetarët e Kirgistanit, si qytetarët e të gjitha vendeve të hapësirës së OSBE-së, meritojnë zgjedhje të lira e demokratike”, shton kreu i shtetit, në një reagim në FB.
Reagimi vjen në një kohë kur edhe në vendin tonë tema e parregullsive në votime dhe blerja e votës, vijon të jetë një “patate e nxehtë”, teksa disa muaj na ndajnë nga data e zgjedhjeve parlamentare.
Presidenti Ilir Meta ka bërë apel në mënyrë të përsëritur për zgjedhje të lira e të ndershme.
