Kreu demokrat Lulzim Basha ka shkuar pranë naftëtarëve në Ballsh, që kanë nisur prej 9 ditësh një grevë urie, ndërsa qeveria nuk ka asnjë reagim.
Basha tha se e gjithë kjo situatë është rezultat i premtimeve të pambajtura nga Qeveria.
“Më vjen keq që brenda pak muajsh naftëtarët zhvillojnë dy greva urie dhe nuk ka asnjë zgjidhje për ta”, tha Basha.
Një nga grevistët e urisë tha se situata është e pashpresë, ndërsa qeveria na ka mashtruar.
“Nuk mund të luhet më me fatin e naftëtarëve”, tha grevisti.
Ndërsa, Basha tha se ky rajon dhe ai në Bulqizë janë dy nga qytetet më të varfëra, megjithëse në Ballsh ka naftë dhe në Bulqizë minerale.
“Pasurohen vetëm një grup njerëzish, pasi qytetarët janë të varfër. Ky është produkti i aferave korruptive. Kush i ka blerë asetet e rafinerisë këtu?
Pse mbahen fshehtë fituesit dhe a janë respektuar procedurat ligjore të tenderit? Zgjidhja do të jetë një: shuma e parave që iu detyrohen të gjithë punëtorëve për 16 muaj.
Ato para nga qeveria e ardhshme do të merren përsipër nga shteti, 8 mln euro do paguhen fillimisht nga shteti, por këto para do ua marrim atyre që e kanë sjellë këtë situatë deri këtu”, tha Basha.
