Loredana Zefi i ka dhënë fund mosmarrëveshjes me familjen zvicerane, që e akuzuan për vjedhjen e të paktën 1 milionë frangave. Çështja gjyqësore ndaj reperes shqiptare është mbyllur.
Sipas mediave zvicerane, Loredana Zefi dhe zonja Petra arritën në një marrëveshje dhe reperja duhet ti paguajë 400.000 franga asaj. Avokati mbrojtës i Loredanës, Thomas Fingerhuth tha se është i kënaqur me rezultatin e zgjidhjes së mosmarrëveshjes.
“Jemi të lumtur që arritëm në një rezultat të kënaqshëm për të dyja palët,”– tha avokati. “Ishte e rëndësishme për Loredanën dhe zonjën Petra që ta zgjidhnin në mënyrë miqësore. Gjithashtu e rëndësishme është që ato flasin me njëra-tjetrën dhe kanë sërish një marrëdhënie të mirë.”
Sipas Zyrës së Prokurorit Publik të Lucernit, Loredana e pranoi që u shtir si avokate duke mashtruar palën e dëmtuar për ti marrë para.
“Gjithashtu ajo i kërkoi falje palës së dëmtuar për veprimet e saj të paligjshme duke marrë përgjegjësi të plotë mbi ato që ka bërë,”– shkruan 20 Minuten.
Përveç dëmshpërblimit, reperja gjithashtu pagoi shpenzimet gjyësore të zonjës Petra.
Rreth dy javë më parë, Loredana zbuloi se kishte zgjidhur mosmarrëveshjen me familjen zviceriane por pa dhënë shumë detaje. Ajo postoi një foto ku shfaqet duke folur me video-call me zonjën Petra, teksa përshëndeten dhe i buzëqeshin njëra-tjetrës.
