Mazhoranca dhe një pjesë e opozitës parlamentare kanë miratuar ndryshimet në Kodin Zgjedhor.
Edhe pse kryeministri një ditë më parë do të fliste për 84 vota që do të mjaftonin për ta shndërruar në ligj, sot kanë qenë 97 deputetë që kanë dhënë votën pro. 15 vota shkuan kundër dhe 5 abstenime.
Kujtojmë se PS ka vetëm 74 deputetë, të pamjaftueshme për të siguruar shumicën parlamentare ndaj dhe janë dashur votat e 23 ligjvënësve të opozitës parlamentare. Votimi u krye me fletë dhe jo elektronik.
Në një komunikim me mediat jashtë parlamentit, kryeministri Edi Rama u shpreh se, pas votës së 97 deputetëve Kodi i ri Zgjedhor është ligj dhe i padiskutueshëm.
Gjatë seancës së sotme, disa deputetë të opozitës parlamentare u pozicionuar kundër ndryshimeve të PS-së të padakortësuara me opozitën. Lefter Maliqi, Rudina Hajdari e të tjerë kërkuan ndërprerjen e seancës dhe mosmiratimin e nismës. Deputeti Halit Valteri akuzoi se janë blerë deputetë nga mazhorancës për të dhënë votën “pro”.
Lidhur me ndryshimet, foli më herët dhe kryeopozitari Basha i cili tha se “janë plotësisht antikushtetuese”. Edhe Presidenti Ilir Meta bëri apel që nisma të mos miratohet pa konsensus.
