Nëntë muajt e parë të këtij viti u mbyllen me 41 krime që shkaktuan 37 viktima. Disa prej tyre për hakmarrje dhe përplasje mes bandash. Krahasuar me të njëjtën periudhë të një viti më parë, shifrat janë thuajse të njëjta. Nga janari deri në shtator 2019 kanë ndodhur 43 vrasje, 2 më shumë se këtë vit.
Por në një kohë që prej 3 muajsh, vendi ynë ka qenë në izolim nga pandemia Covid-19. Statistikat tregojnë se nga 9 Marsi kur edhe nisi izolimi total e deri në fund të Majit, janë shënuar 8 krime me 11 viktima.
Atentatet për larje hesapesh apo gjakmarrje, nisën vetëm një javë pas ndërrimit të viteve. Mëngjesin e 7 janarit, në qendër të Rrëshenit ekzekutohet me një plumb në zemër Kastriot Reçi në sy të një fëmije të mitur. Për muaj me radhë, kjo ngjarje vijon të mbetet e pazbardhur. Dyshimet e policisë janë se vrasja ndodhi për shkak të hakmarrjes me fisin Gjini po në Rrëshen.
Vrasja e Reçit, pasoi me një tjetër atentat, tashmë të zhvendosur në Tiranë. Mbrëmjen e 15 Shtatorit, kryeqyteti u trondit nga një shpërthim i fuqishëm tritoli. Presona ende të paidentifikuar kishin vendosur lëndë plasëse në mjetin me të cilën udhëtonte Preng Gjini. Për pasojë ai mori plagë të rënda në trup, ndërsa dy kalimtarë të rastit mbetën të dëmtuar. Hetuesit kanë dyshime se këto vrasje kanë lidhje me njëra-tjetrën, ngjarje që në 5 vitet e fundit kanë shkaktuar 5 viktima mes dy fiseve.
Për atentatin ndaj Preng Gjinit, ministri Sandër Lleshaj tha se policia mund ta kishte menaxhuar më mirë këtë situatë. Përgjatë këtyre muajve, Tirana shënoi jo pak atentate e vrasje të tipit mafioz. Më 17 Janar, në Kamëz rrëmbehet Jan Prenga. Pas disa javësh hetimesh, policia tha zyrtarisht se ai ishte vrarë. Në kërkim, ai autori kryesor vijon të mbetet Altin Hajri, që sipas policisë ai ishte porositur nga një tjetër grup kriminal që merrej me trafikun e drogërave të forta. Jan Prenga u fsheh fillimisht në kompleksin “Golden” në Shijak, ndërsa trupi i pa jetë i tij nuk është gjetur ende. Hetimet zbuluan se Prenga u mor peng dhe u vra për shkak të një sasie kokaine të të vëllait të tij, Antonio.
Mbrëmja e 11 qershorit ngriti në këmbë policinë e Tiranës. Në zonën e “Komunës së Parisit”, ekzekutohet brenda makinës së tij Hekuran Billa. Nuk kaluan shumë ditë, kur policia zyrtarizoi arrestimin e autorëve të dyshuar. Viktor Marku, bashkë me nipin Sebastian Malin mori hakun e të vëllait, Prel Markut. Ky i fundit ishte vrarë në Angli në 2006-ën nga Hekuran Billa. Për krimin, Billa ishte dënuar përjetë, por më pas përfitoi nga gjykimi i shkurtuar.
Rendi dhe siguria ishte jo pak e qetë edhe në qytetin e Elbasanit. Në 22 dhe 29 Korrik vriten Emiljano Ramazani dhe Regis Runaj. Ngjarjet kishin lidhje me njëra-tjetër. Policia arrestoi dy autorët e dyshuar si vrasës me pagesë. Ndërsa si porositës së tyre, prangosën Erion Alibejn, për të cilin dyshojnë se është edhe organizator në vrasjen e Bujar Çelës, vëllait të Talo Çelës, mëngjesin e 17 Shtatorit. Edhe kjo ngjarje dyshohet të ketë ndodhur për hakmarrje mes grupeve.
Në Durrës, në 9 muaj u regjistruan 6 krime që lanë të vrarë 8 persona, mes të cilëve edhe atentati ndaj dy vëllezërve Besmir dhe Viktor Haxhia. Pikërisht në këtë vrasje të dyfishtë, një nga dy autorët e arrestuar bashkëpunoi me drejtësinë. Ai i tha hetuesve emrat e personave që kishin porositur krimin apo kush kishte dijeni për të. Mes tyre ishte edhe emri i Talo Çelës, për të cilin policia e kishte në kërkim si një nga autorët e grabitjes së miliona eurove brenda pistët së aeroportit të Rinasit më 9 Prill të 2019-ës.
Por pavarësisht shifrave të larta të kriminalitetit në vendin tonë, qofshin ato të krimeve në familje, për motive të dobëta ato atentate të tipi mafioz, ministri Lleshaj e cilëson këtë situatë në nivelet më të mira historike. “Ngjarjet janë ngjarje, por ngjarjet nuk janë të atij niveli sa të përmbysin situatën. Pra duhet të bëjmë një dallim midis tablosë së përgjithshme të situatës së rendit dhe të sigurisë publike, e cila është duam apo nuk duam në nivelet më të mira historike.
Se këtë e provojnë shifrat, të cilat janë publike tashmë, jo vetëm shifrat e publikuara nga ne, por edhe shifrat e publikuara në nivel ndërkombëtar. Ju këshilloj si gazetarë, sepse ju e dini që jeni hulumtues të mirë mund të konsultoni “Eurostatin” dhe të shihni se në cilat nivele është siguria dhe rendi publik në Shqipëri” tha ai.
VRSASJET NE 9 MUAJ
Janar-Shtator 2020 41 krime
Janar-Shtator 2019 43 krime
VRASJET GJATE PANDEMISE
14 MARS, vritet Julian Halili
23 PRILL, vritet Petrika Treska
27 PRILL, vriten Kolë Murrani dhe Preng Simoni
27 PRILL, vriten Besmir dhe Viktor Haxhia
12 MAJ, vritet Ramadan Çela
28 MAJ, vritet Kristian Breshanaj
30 MAJ, vriten Bujar Lika dhe Paulin Gjergji
31 MAJ, vritet Ylli Luçaj /abcnews/
