Në burgun e Burrelit kanë nisur sot kërkimet për gjetjen e eshtrave të të zhdukurve në kohën e diktaturës.
Iniciator është italiani Aldo Renato Terrusi, i cili humbi të atin në vitin 1952, në këtë burg famëkeq.
Në këtë burg mendohet të jenë varrosur dhe shumë të burgosur të tjerë që kanë humbur jetën nga torturat, sëmundjet apo uria, por është hera e parë që merret një akt i tillë për gjetjen e tyre.
Drejtoresha e Autoritetit të Dosjeve, Gentiana Sula ka publikuar foto nga gërmimet e sotme.
Në postimin e saj, ajo shprehet se është një proces i gjatë, që ndoshta mund të mos rezultojë i suksesshëm, por është e domosdoshëm.
“Po ndodh. Nën udhëheqjen e Task Forcës së posaçme, po gërmohet në oborrin e Burgut të Burrelit për të gjetur gjurmë të varreve të humbur në komunizëm.
Do të jetë një proces shumë i gjatë, dhe mbase i pasukseshem në disa raste, por i domosdoshëm dhe i përgjegjshëm. I uroj familjareve kurajo, durim dhe force për të vene në vend dinjitetin njerëzor të të dashurve te tyre”, thuhet në postimin e Sulës.
