Ministria e Arsimit do të shtojë rreth 1000 mësues për të përballuar nevojat për punonjës arsimorë gjatë periudhës së pandemisë në vitin shkollor 2020-2021.
Kjo të paktën është arsyeja që jepet lidhur me shtesën e personelit në rradhët e mësuesve, por mund të hidhen dyshime se një nismë e tillë mund të ketë lidhje edhe me zgjedhjet.
Vendimi është miratuar në mbledhjen e Qeverisë, ndërsa ministrja e Arsimit, Evis Kushi, thekson se sa më rigorozë që të jemi në këtë aspekt, aq më e lehtë do të bëhet edhe sfida jonë e përbashkët për të kujdesur për shëndetin e nxënësve, mësuesve, prindërve e kujtdo tjetër, dhe njëkohësisht të sigurojmë mbarëvajtjen e procesit mësimor në këtë vit jo të lehtë shkollor.
Nuk dihet se çfarë parashikon Qeveria të ndodhë që ka shtuar personelin e mësuesve me 1 mijë persona, ndërkohë që shkollat u hapën pa asnjë masë, prindërve u kërkohet të plotësojnë formularë, duke i lënë përgjegjësinë mbi supe, ndërsa mësuesve nuk u garantohen testimet për Covid-19 falas.
