Ministrja e Shëndetësisë, Ogerta Manastirliu pranoi këtë të Martë se ka pasur vonesa në kryerjen e tamponëve ndaj personave të dyshuar me koronavirus.
E ftuar në një studio televizive, Manastirliu u justifikua duke thënë se vonesa në marrjen e tamponëve ndodhin edhe në vende të tjera, duke përmendur Italinë dhe Shtetet e Bashkuara të Amerikës.
“Asnjë qytetar nuk ka mbetur pa u testuar, vonesa ka patur edhe në Itali, edhe në Amerikë u deshën tetë ditë për një tampon”, tha Manastirliu në “Open”.
Ministrja u shpreh se pavarësisht se shifrat e përditshme të infektimeve me Covid janë të larta, ato janë brenda parashikimeve.
Lidhur me vaksinat e gripit, tha se mbërrijnë nesër në vend dhe do të nisë fillimisht testimi te mjekët e infermierët.
Ajo sqaroi se ISHP do të hartojë një strategji dhe grupet e riskut do vaksinohen falas.
