Shtatë persona janë arrestuar në lidhje me një sulm jashtë ish-zyrave të revistës satirike Charlie Hebdo në Paris. Një burrë i armatosur me një thikë plagosi dy persona në një sulm të Premten.
I dyshuari kryesor, i identifikuar si një 18-vjeçar me origjinë pakistaneze, u arrestua pranë vendit të ngjarjes. Policia tha se gjashtë të tjerë ishin në paraburgim dhe po merreshin në pyetje. Sulmi po trajtohet si një incident terrorist.
Ministri i Brendshëm Gérald Darmanin tha se ishte “qartë një akt i terrorizmit islamik”. Ai theksoi se policia kishte nënvlerësuar nivelin e kërcënimit në zonë.
Sulmi erdhi ndërsa një gjyq i profilit të lartë ishte në proces për 14 persona të akuzuar për ndihmën ndaj dy xhihadistëve për të kryer sulmin në vitin 2015 ndaj Charlie Hebdo, në të cilin u vranë 12 persona.
Charlie Hebdo liroi zyrat pas sulmit në 2015 dhe ndërtesa tani përdoret nga një kompani e prodhimit televiziv.
Dy viktimat e sulmit të së Premtes nuk janë identifikuar zyrtarisht, por policia tha se ata ishin një burrë dhe një grua që punonin në kompaninë e prodhimit.
Charlie Hebdo tani drejtohet nga një vend i fshehtë.
