Edhe pse anglishtja po quhet gjithmonë e më shumë gjuha e botës, realisht numrin më të madh të folësve e ka gjuha kineze. Një prej 845 milionë njohësve të kinezçes në botë, është edhe deputeti socialist Fidel Ylli, i cili prej disa ditësh ndodhet në Kinë, si pjesë e delegacionit që shoqëron kryetarin e kuvendit, Ilir Meta.
Në një drekë pune gjatë qëndrimit në Kinë, Yllit nuk i ka shpëtuar rasti që t’ia marrë këngës kineze.
Provën se di të flasë e të këndojë në këtë gjuhë të vështirë, socialisti e dha që në vitin 2011, kur performancën e parë e bëri nga foltorja e kuvendit.
Ndoshta kjo ka qenë arsyeja që Meta e përfshiu Fidel Yllin në delegacionin e tij. Por çudirat nuk mbarojnë me kaq. Në takimet zyrtare, një tjetër deputet shqiptar ka rënë në sy për veshjen e tij. Edi Paloka, ishte veshur me pulovër dhe pantallona casual, pa xhaketë e kollare. Një veshje e tillë ka çuditur edhe kinezët.
Gjatë vizitës zyrtare, kryeparlamentari Meta ka takuar ndër të tjerë edhe Presidentin e korporatës “Power Construction Corporation of China”, Yan Zhiyong, kërkoi nga korporata kineze që të shihet me shumë interes edhe ndërtimi i hekurudhës që lidh Shqipërinë me Maqedoninë, projekt me interes edhe në kuadër të Korridorit të 8-të. /BW/
