Donika Prela është shkarkuar nga detyra, nga Kolegji i Posaçëm i Apelimit, pas evidentitimit të problemeve me justifikimin e pasurisë.
Në seancën e sotme, mungonte subjekti i rivlerësimit Prela dhe avokatja e saj.
Natasha Mula, kryesuese e trupës gjykuese tha se KPA arriti në konkluzion se “subjekti i rivlerësimit Donika Prela ka kryer deklarim të pasaktë dhe të pamjaftueshëm të pasurisë së saj dhe të personave të lidhur me të”.
Ish-shefja e Prokurorisë së Krimeve të Rënda u konfirmua në detyrë në shkurt 2019 nga Komisioni i Pavarur i Kualifikimit, pavarësisht problematikave të shumta që nxori në pah seanca dëgjimore. Në prill 2019, Komisioneri Publik i kërkoi Kolegjit të Posaçëm të Apelimit shkarkimin e saj, duke argumentuar se nuk justifikon një pjesë të pasurisë.
Pasuria
KPA renditi problematikat me pasurinë e ish-drejtueses së Prokurorisë së Krimeve të Rënda:
- Në lidhje me pasurinë apartament banimi me sipërfaqe 95.6 m2 ndodhur në “Rrugën Bajram Curri” – Tiranë, rezultoi se subjekti i rivlerësimit ka mungesë të burimit financiar të ligjshëm për të justifikuar pasurinë.
- Në lidhje me pasurinë likuiditet në shumë 4 mln e 501 mijë e 427.89 Lekë rezultoi se subjekti i rivlerësimit ka mungesë të burimit financiar të ligjshëm për të justifikuar pasurinë.
- Në lidhje me transaksionin e huadhënies në shumën 25 mijë Euro, Kolegji arriti në konkluzion se kjo shumë është pasuri e subjektit të rivlerësimit dhe personit të lidhur me të. Për këtë pasuri rezultoi se ka mungesë të burimit financiar të ligjshëm për të justifikuar krijimin e saj dhe është kryer fshehje pasurie.
https://www.youtube.com/watch?v=1S7_l1UUIlg&feature=emb_logo
