Pavarësisht votimit të parë, Kryetari i Parlamentit Ilir Meta nuk ka dhënë garanci për rivotimin e ligjit për importin e mbetjeve i kthyer nga Presidenti në Kuvend për rishqyrtim.
Në një intervistë për radion “CRI Shqip”, Meta nënvizoi se LSI-a do të lexojë me vëmendje argumentet e Presidentit të Republikës.
Nga ana tjetër, Kryeministri Edi Rama shprehet mjaft i bindur dhe i sigurt që ligji i mbetjeve është hartuar sipas normave të BE-së dhe do të miratohet përsëri në Parlament.
Sa i përket koalicionit me PS për zgjedhjet e ardhme parlamentare, Ilir Meta u shpreh se është e rëndësishme që koalicioni të përmbushë pritshmëritë e qytetarëve deri në fund të mandatit.
“Për sa u përket koalicioneve ato do të vendosen nga forumet respektive të forcave politike. Për ne është e rëndësishme të shtojmë kontributin për stabilitetin e vendit, për reformimin e tij dhe dihet të kontributi i LSI-së do të jetë vazhdimisht në rritje”, tha kryeparlamentari Meta.
Ilir Meta ndodhet në Pekin për një vizitë zyrtare në krye të një delegacioni të gjerë parlamentar. Gjatë qëndrimit në Pekin zoti Meta takoi të martën kryetarin e Konferencës Konsultative Politike, Yu Zhengsheng.
