Një pedagog i fakultetit të Shkencave Sociale në Universitetin “Fan Noli” të Korçës, së bashku me një person tjetër kanë rënë në pranga.
Të arrestuarit janë Alket Dino, 34 vjeç dhe Xhevi Dervishi, 35 vjeç. Dino akuzohet se ka përfituar shuma monetare në këmbim të dhënies së provimeve për studentët. Ndërkohë, Dervishi akuzohet se ka bërë ndërmjetësin mes pedagogut dhe studentëve. Ky i fundit, sipas të dhënave në rrjetet sociale pasqyruar nga vetë ai, është pronari i një agjencie imobiliare.
Hetimet për arrestimin e tyre u koordinuan nga SPAK.
“Shtetasit e mësipërm, janë kapur në afërsi të këtij Fakulteti me një sasi prej 300 eurosh dhe 50.000 lekë, të cilat nga hetimet e kryera dyshohet se i kanë përfituar në mënyrë të kundërligjshme nga studentët, të cilat u sekuestruan në cilësinë e provës materiale”, njoftoi policia e Korçës.
Materialet i kaluan Prokurorisë së Posaçme Kundër Korrupsionit dhe Krimit të Organizuar Tiranë për veprat penale “Korrupsioni pasiv i personave që ushtrojnë funksione publike”, “Korrupsioni aktiv” dhe “Ushtrimi i ndikimit të paligjshëm”, shtuan të njëjtat burime.
