Ndonëse policia e Fierit deklaroi se në banesën ku prej mbrëmjes së të shtunës, shtetasi Elton Meta, 31-vjeç, kërcënon me vetëvrasje, nuk ka persona të tjerë, raportohet se në godinën 3 katëshe në Zhupan, ndodhen 5 persona.
Nga raportimet ata ndodhen të mbyllur në një nga dhomat e banesës 3 katëshe, ndërsa forcat RENEA kanë nisur negociatat me 31-vjeçarin, që kërcënon vetëvrasjen me një armë automatike.
Banesa ku po ndodh ngjaja i përket familjarëve të bashkëshortes së të riut.
Elton Meta kishte pak kohë që ishte kthyer nga Greqia ku punonte, ndërsa dyshimet e para flasin për një konfliktit në familje që ka nisur për motive xhelozie.
Fqinjët shprehen se i riu ka pasur një marrëdhënie të mirë, jo vetëm me familjarët e gruas, por edhe të afërmit e saj, mes tyre edhe xhaxhanë që ka një biznes në katin e parë të banesës.
31-vjeçari nuk pranon që të negociojë me askënd duke kërcënuar me vetëvrasje. Madje, ai largoi edhe motrën e tij duke i bërtitur që të ikë nga vendi i ngjarjes.
Çifti ka 6 vite martuar dhe kanë një fëmijë 3-vjeç. Në vendin e ngjarjes përpos policisë ndodhet edhe një ambulancë. Qarkullimi në rrugën nacionale Fier-Vlorë, në afërsi të Qafës së Koshovicës është bllokuar.
