Ditët e fundit, një seri krimesh të rënda kanë ndodhur në vend. I fundit ishte atentati në Brandashesh të Elbasanit këtë të Enjte, ku 50-vjeçari Bujar Çela u ekzekutua në një atentat mafioz pasi parkoi makinën dhe shkoi të ulej në një lokal për të konsumuar kafen e mëngjesit.
Vrasja dyshohet se ka lidhje me aktivitetet e të vëllait të viktimës, Talo Çela. Ky i fundit është aktualisht në kërkim policor për vrasje dhe grabitjen në Rinas.
Një tjetër ngjarje tronditëse ishte ajo e ndodhur në zonën e njohur si “NSHRAK” në Tiranë pasditen e së Martës. Në makinën me të cilën lëvizte Preng Gjini, shpërtheu një sasi eksplozivi që solli plagosjen e tij si dhe të dy kalimtarëve në zonë. Më herët gjatë asaj dite, një tjetër vrasje ndodhi në Bathore.
Lidhur me krimet në vend, ka pasur një reagim në rrjetet sociale, me “meme” që kanë vënë në qendër të vëmendjes Ministrin e Brendshëm Sandër Lleshaj dhe drejtuesin e grupit parlamentar të PS-së, Taulant Balla. Ky i fundit, në një deklaratë të bërë pak ditë më parë, shprehej se, Lleshaj kishte bërë një punë të mirë në detyrën si Ministër i Brendshëm.
