Banorët e Klosit kanë bllokuar sot rrugën Peshkopi – Tiranë për 1 orë bashkë me bagëtitë e tyre. Shkak i protestës ndaj qeverisë është mungesa e vaksinës për sëmundjen e gjedhit, dermatozën nodulare, e cila ka prekur në masë lopët e fermerëve në disa fshatra në Klos dhe Mat.
Banorët thanë se për shkak të mosvaksinimit, qindra bagëti u kanë ngordhur. Është dashur ndërhyrja e policisë që banorët të largohen nga rruga në afërsi të fshatit Klos Katund.
Kjo protestë, e para dhe të rrallat e këtij lloji, ku banorët protestojnë për një çështje direkte që dëmton ekonominë e tyre familjare, vjen pas deklaratave të shpeshta të Ministrisë së Bujqësisë se e ka mbuluar me vaksinim gjithë vendin dhe e ka vënë nën kontroll këtë sëmundje të rrezikshme për gjedhët dhe njerëzit.
Fermerët kanë kërkuar zgjidhje pasi në të kundërt kanë paralajmëruar se do të bllokojnë sërish rrugën.
