Në epokën e internetit, mbulimi dhe sidomos cilësia e rrjetit është një ndër elementët kryesorë të promocionit të operatorëve celularë.
Është e zakontë që në reklamat e tyre operatorët të pretendojnë se kanë rrjetin më të mirë dhe ofrojnë internetin më të shpejtë. Çdo përdorues mund të gjykojë vetë për cilësinë e shërbimit që merr nga operatori i vet, megjithatë, për të dhënë një informacion krahasues më objektiv, Autoriteti i Komunikimeve Elektronike dhe Postare ka bërë matje lidhur me mbulimin me rrjet që ofron secili operator celular dhe shpejtësinë e shkarkimit të të dhënave nga secili prej tyre në qyteatin e Tiranës.
Treguesi ndoshta më i rëndësishëm në marketing, ai i shpejtësisë së shkarkimit të të dhënave është testuar nga AKEP në qytetin e Tiranës. Sipas afro 20 mijë matjeve të kryera për të katër operatorët, shpejtësinë mesatare më të lartë të internetit e ofron operatori Vodafone Albania me rreth 17.9 megabit për sekondë, i ndjekur nga Eagle Mobile me 16.7 megabit për sekondë, shkruan Scantv.
Telekom Albania ka dhënë një rezultat mjaft zhgënjyes, me rreth 5.9 megabit për sekondë, ndërsa Plus Communication renditet e fundit, me shpejtësi mesatare të internetit rreth 1.9 megabit për sekondë.
Në fund të vitit 2015, operatorët ofronin mbulim pothuajse të plotë të popullsisë me teknologjinë GSM, që shërben kryesisht për thirrje dhe mesazhe të shkruarae. Ndërsa, për sa i takon teknologjisë 3G dhe 4G, që mundëson ofrimin e internetit me brez të gjerë, mbulimi është disi më i ulët. Treguesit më të lartë i ka Vodafone, që mbulon 99% të popullsisë dhe 88% të rrjetit.
E dyta renditet Telekom Albania me 96% të popullsisë dhe 87% të territorit. Albtelecom me rrjetin e vet të lëvizshëm Eagle Mobile mbulon 90% të popullsisë dhe 87% të territorit. Për Plus nuk ka të dhëna, duke qenë se deri në fund të vitit të kaluar ky operator ende nuk ofronte shërbime 3G.
