Policia ka vënë në pranga sot autorin e një sërë grabitjesh të ndodhura në periferi të kryeqytetit dhe në qendër, i cili ka rezultuar një punonjës i Gardës së Republikës. Mësohet se videot e publikuara prej dy ditësh në media kanë cuar në zbulimin e grabitësit të karburanteve, me armë dhe maskë në fytyrë.
Sipas të dhënave zyrtare ai është 21-vjecari Geraldo Guci, banues në Tiranë. Guci është arrestuar nga specialistët e Komisariatit të Policisë Nr 2, në kuadër të operacionit të koduar “Grabitësi”.
21-vjecari, pasi linte mjetin e tij në një distancë të konsiderueshme dhe kontrollonte me kujdes territorin, bënte goditjet në karburant. Shumën monetare të marrë në karburante dhe armën e zjarrit sëbashku me veshjen, i vendoste në brendësi të sediljes së mjetit të tij tip “Mercedes Benz”, për t’ju shmangur pikave të kontrollit.
Ky shtetas rezulton të jetë autor i dyshuar i disa vjedhjeve me armë, të disa karburanteve në Tiranë dhe konkretisht:
1. Më datë 16.10.2016, në rrugën “Isuf Elezi”, Selitë është vjedhur nëpërmjet kërrcënimit të armës, një karburant, ku janë marrë 8.000 lekë dhe një aparat telefonik “iPhone”
2. Më datë 12.10.2016, në rrugën “Isuf Elezi”, Selitë është vjedhur nëpërmjet kërrcënimit të armës, një karburant, ku janë marrë 15.000 lekë
3. Më datë 09.10.2016, në rrugën “Teodor Keko”, është vjedhur nëpërmjet kërrcënimit të armës, një karburant, ku janë marrë 20.000 lekë.
4. Më datë 03.09.2016, në rrugën “Myslym Shyri”, është vjedhur nëpërmjet kërcënimit të armës, një karburant, ku janë marrë 40.000 lekë.
Në cilësinë e provës materiale janë sekuestruar:
1. Një aparat telefonik i tipit “iPhone 6”, i vjedhur më datë 16.10.2016, shtetasit H. S.
2. Një automjet i tipit “Mercedes Benz”, TR8483P, në pronësi të shtetasit Geraldo Guci, ku në brendësi të saj u gjendën: Tre gëzhoja pistolete model 54 dhe dy fishekë automatiku model 56.
Materialet proceduriale i kaluan Prokurorisë pranë Gjykatës së Shkallës së Parë Tiranë, për veprat penale të “Vjedhja me armë” dhe “Prodhimi dhe mbajtja pa leje e armëve luftarake dhe e municionit”, parashikuar nga Nenet 140 dhee 278/2 të Kodit Penal
