Sot në orën 17:00 Tirana dhe Vllaznia sfidojnë njëra-tjetrën në “Selman Stërmasi” në një ndeshje miqësore përpara fillimit të sezonit të ri.
Të dyja ekipet vijnë në këtë sfidë me disa mungesa. Derrick Sasrak ishte një nga lojtarët e afruar te Tirana në këtë merkato vere. Sulmuesi ganez erdhi në Shqipëri para 4 ditësh, ndërsa ka zbritur në fushë vetëm një ditë me bardheblutë.
26-vjeçari ka ndjerë dhimbje në kofshë dhe kjo ka detyruar stafin mjekësor t’i japë disa ditë pushim. Edhe pse pritej që të ishte lojtari që do të mbante peshën e sulmit, nuk ka ndodhur kështu me afrikanin duke mos arritur të tregojë aftësitë e tij në fazën ofensive.
Veç ganezit, Erion Hoxhallari është lojtari tjetër që shqetëson kampionët e vendit. Mëngjërashi është dëmtuar gjatë një seance stërvitore dhe nuk do të jetë i gatshëm sot për miqësoren ndaj Vllaznisë. Nuk bëhet fjalë për diçka serioze dhe pritet që të rikthehet në fushë në ditët në vijim për t’iu bashkuar ekipit bardheblu në stërvitje.
Ndërkohë nga ana tjetër, për skuadrën e drejtuar nga trajneri gjermano-kroat, Brdaric do të mungojnë Bardulla, Sidorenco, Hoxhaj dhe Mandiangu.
Dy lojtarët e fundit janë prurje të kësaj merkatoje, ndërsa futbollistët janë jashtë prej dëmtimeve.
