Nga Boldnews.al
Ndërsa ministri i Brendshëm Sandër Lleshaj zbriti nga automjeti luksoz BMW i tipit të fundit, e blerë sipas tij “vetëm 49 mijë euro”, në Uzinën e Ballshit policia hodhi gaz lotsjellës për të shpërndarë punëtorët e irrituar që kanë vite pa marrë pagat. Ministri as që i hodhi një sy situatës atje, sepse një protestë për bukën e fëmijëve ishte fare pa rëndësi para sqarimit të tij se BMW-në që ai vendos b… e shëtit kudo, nuk e kishte blerë 150 mijë euro, por më pak, me një çmim të “papërfillshëm” sipas tij, 49 mijë euro.
“Po bëhen disa muaj që një automjet i dalë jashtë përdorimit është zëvendësuar me një të ri. Automjeti nuk ka kushtuar 100 milionë lekë, as 150 mijë Euro, sikundër përpiqen të infektojnë opinionin publik shpellat e dyshimta virtuale, por vetëm 49 mijë Euro” – thotë Lleshaj, duke shtuar më pas se po hidhet baltë mbi të nga “shpifje monstruoze”.
Këtë qëndrim e mbajti pikërisht ndërsa para Uzinës së Përpunimit të Naftës në Ballsh po mbahej një protestë nga punëtorët. Policia pasi shtoi masat dhe solli me urgjencë FNSH-në e Fierit, gjeti si mënyrë të shpejtë për shpërndarjen e punëtorëve përdorimin e gazit lotsjellës.
Me thirrjet: “Jo politikë, duam bukë për fëmitë”, punëtorët e rraskapitur edhe nga mungesa e ushqimit dhe qëndrimi në vapë, duruan për pak çaste edhe gazin lotsjellës, ku njëri prej punëtorëve pësoi edhe gjendje të fikëti.
Kërkonin me megafon edhe reagimin e Ministrit të Brendshëm Sandër Lleshaj për situatën e krijuar atje dhe Lleshaj reagoi, por jo për atë që ndodhte në Ballsh, sepse i dukej një ngjarje pa vlerë, por duke justifikuar blerjen e mjetit luksoz, ku do të shtyjë edhe shtatë muaj në qeverinë e kryeministrit Edi Rama.
Lleshaj e sheh shqipërinë surreale në botën e çudirave dhe haluçinative nga një BMW e shtrenjtë, qoftë edhe për “vetëm 49 mijë euro” pa TVSH, por për qytetarët protestues ka vetëm një haraç; përdorimin e gazit lotsjellës. Të vesh b… në autoveturën luksoze të prodhimit gjerman dhe të urdhërosh që në magazinat e ndyra të policisë të dalë gazi lotsjellës serb për ta përdorur mbi qytetarët, duke më shumë se paradoksale.
Ky nuk është vetëm një incident, pasi Lleshaj i cili spaletat e gjeneralit i ka futur me kohë në kasafortën e Rilindjes së Edi Ramës do të mbahet mend si ministri që dendi në gaz lotsjellës qytetarët e tij. Në kohën e protestave të opozitës u shpërthyen me qindra bomba me gaz lotsjellës duke palosur në tokë edhe gra dhe fëmijë që nuk kishin asnjë lidhje me protestën.
Sikurse e ka pranuar vetëm ai me gjasë do të ikë nga Ministria e Brendshme, por këto shtatë muaj do i shijojë duke bredhur me automjete të shtrenjta, pikërisht në kohën kur qytetarët po numërojnë kacidhet e fundit për të siguruar ushqimin e përditshëm.
