Irma Marku, mësuese në shkollën e mesme “Ismail Qemali” në Tiranë, ka evidentuar të gjitha problematikat me të cilat do të përballet arsimi në Shqipëri në kushtet e pandemisë së Covid-19.
Duke e konsideruar një propogandë qeveritare atë që thuhet lidhur me masat, Marku tha se nuk mund të garantohet jo vetëm një mësimdhënie cilësore, por as respektimi i masave.
“Në shkollën ku unë jam mësim, klasat kjanë ndarë në grupe prej 17 ose 18 nxënësish, por ruajtja e distancës nga banka e parë te dërrasa e zezë nuk është mbi 1 metër, sikundër kërkohet.
Mësuesit do të kthehen thjesht në dirigjentë, pasi i duhet të ruajnë distancën, nuk duhet të lejojnë nxënësit të kalojnë nga një bankë në tjetrën, nuk duhet të lejojnë punën në grup, duhet të mbajnë maska dhe të shikojnë nëse edhe nxënësit i mbajnë ato. Duke pasur parasysh edhe zgjatjen e orëve të mësimit, atëherë merreni me mend se çfarë do të ndodhë”, tha Marku.
Sipas saj, mësuesve dhe stafeve në tërësi duhet ti garantohet bërja e tamponit falas, ndërkohë që e konsideroi një papërgjegjshmëri faktin segjithë përgjegjësia bie mbi mësuesit, prindërit dhe nxënësit.
“Na kanë sjellë një udhëzim ku thuhet se dita e parë e shkollës duhet të jetë ditë feste. Festë në kohë pandemie? Është nonsens. Unë si mësuese nuk kam një orar se kur nis mësimin, ndërkohë që nesër unë duhet të jem në shkollë. Nuk është i zgjidhur transporti për mësuesit dhe nxënvsit dhe jemi një vend që nuk respektohen as masat në transportin publik”, tha Marku për abcnews.
Ajo u shpreh se në kushte të tilla mësimi në shkolla nuk duhej të niste, ndërsa duhej të vazhdonte mësimi online.
“Mendoj se është një situatë ku prindërit duhet të ndërgjegjësohen, tëmbrojnë fëmijët e tyre, pasi kushtet dihen”, tha ajo.
Sipas saj, zgjatja e orareve apo zhvillimi me turne i mësimit është një tjetër problem, por tashmë mësuesit janë të mësuar me këtë vështirësi dhe kanë vite që përballen.
