Tensione gjatë shoqërimit të gjyqtares Mimoza Margjeka, nga banesa për në gjykatën e Posaçme.
E irrituar, ajo u shpreh se shoqerimi është bërë në kundërshtim me ligjin. “Jam shoqëruar me një urdhër shoqerimi të paligjshëm”, tha para gazetarëve gjyqtarja, e cila u ankua po ashtu se gjatë shoqërimit, nuk kishte efektive policie femra, siç e parashikon ligji. “Po më sorollasin prej 5 orësh në kryeqytet”, tha gjyqtarja, e cila sqaroi se fllimisht është dërguar pranë gjykatës së Tiranës dhe më pas është dërguar në Gjykatën e Posacme.
“Kisha një vit që e prisja arrestimin. Le të më dënojnë por nuk mund të sillet shteti kështu”, u shpreh ajo.
Gjyqtarja mohoi akuzat që rëndojnë ndaj saj. E arrestuar më herët gjatë javë në bazë të një mase “arrest në shtëpi”, ajo del sot para gjykatës për rivlerësimin e masës së sigurisë.
Arrestimi
SPAK ka urdhëruar arrestimin e ish-Gjyqtares së Durrësit, Mimoza Margjeka. Aktualisht gjyqtare në Korçë ajo akuzohet për korrupsion, pasi sipas hetimeve, bashkëshorti saj ka marrë ryshfet një shumë prej 6 mijë euro për të ndryshuar një vendim. Shuma e parave është marrë për ndryshimin e masës së sigurisë për Orion Balin, i arrestuar në Pogradec, pasi po transportonte emigrantë të paligjshëm.
SPAK ka dokumentuar se Gjyqtarja e Apelit në Korçë, Mimoza Margjeka, ka ndryshuar masën e sigurisë nga arrest me burg, në garanci pasurore, menjëherë sapo bashkëshorti i saj ka marrë shumën prej 6 mijë euro, nga avokati i Orion Balit, Skënder Demiraj. Shuma e parave iu pagua bashkëshortit të gjyqtares nga Nejton Bali dhe Klaudjo Zhilla, të afërm të Orion Balit. Gjykata ka vendosur që Mimoza Margjeka, gjyqtare e Apelit në Korçë, të qëndrojë në masën e sigurisë arrest shtëpie, ndërsa për bashkëshortin e saj Arben Cara, arrest me burg. Edhe për avokatin Skënder Demiraj është dhënë masa arrest shtëpie, ndërkohë që Nejton Bali dhe Klaudio Zhilla janë arrestuar nga policia.
Mimoza Margjeka është gjyqtarja që nuk pranoi të certifikonte mandatin e kryetares së Bashkisë së Durrësit, Valbona Sako, të dalë nga zgjedhjet e 30 Qershorit. Në atë kohë, Mimoza Margjeka e argumentonte vendimin, pasi partia Bindja Demokratike ishte regjistruar përtej afateve ligjore dhe për pasojë fleta e votimit, ku ndodhej edhe kandidatja e Partisë Bindja Demokratike, ishte e pavlefshme. Por vendimi i saj u rrëzua në atë kohë brenda 48 orësh, nga e njëjta gjykatë.
