Paga mesatare në ekonominë private shqiptare njohu një rritje vjetore prej 2.9% në tremujorin e dytë, pavarësisht se numri i të punësuarve ra me afro 45 mijë vetë, duke treguar mënyrën e pabarabartë në të cilën kriza ka goditur shqiptarët.
Instituti i Statistikave bëri të ditur se sipas vlerësimit të saj bazuar mbi Anketën e Forcave të Punës, numri i të punësuarve në ekonominë shqiptare ra me 45 mijë vetë në bazë vjetore në tremujorin e dytë të këtij viti por paga mesatare u rrit në 51,149 lekë me një ritëm vjetor rritjeje prej 2.86%.
Të dhënat e publikuara të enjten tregojnë se pjesa dërrmuese e shqiptarëve kanë dalë jo shumë të dëmtuar nga kriza ekonomike e shkaktuar nga pandemia e koronavirusit të ri ndërsa një pjesë e vogël e tyre kanë humbur vendin e punës, duke sugjeruar se kriza ekonomike i godet njerëzit në mënyrë shumë të pabarabartë.
Të dhënat e Institutit të Sigurimeve Shoqërore të publikuara më herët treguan se 48 mijë shqiptarë humbën pagesën e sigurimeve shoqërore gjatë pandemisë, ose rreth 5% e totalit të të punësuarve me sigurime. Por kjo rënie e të siguruarve nuk u shoqërua me një rënie të të ardhurave, gjë që tregon se të papunët e pandemisë janë në përgjithësi njerëz me të ardhura të ulëra. Shifrat e ISSH ndryshojnë nga ato të INSTAT për shkak se INSTAT i bazon vlerësimet mbi një anketë.
Ekonomia shqiptare pritet të tkurret me 5% këtë vit dhe të rimëkëmbet me 8% vitin e ardhshëm ndërsa buxheti i shtetit është përballur me një deficit shtesë prej rreth 300 milionë eurosh gjatë pjesës së parë të këtij viti. Megjithatë ekonomia ka dhënë shenja për rimëkëmbje të shpejtë pas heqjes së pjesës më të madhe të kufizimeve mbi aktivitetin ekonomik pas muajit qershor.
Sipas INSTAT, paga mesatare bruto në ekonominë shqiptare ishte 54,149 lekë në tremujorin e dytë nga 53,232 lekë në tremujorin e parë dhe 52,645 lekë në tremujorin e dytë të vitit 2019. Të dhënat tregojnë se sektori privat udhëhoqi rritjen e pagave ndërkohë që të punësuarit në sektorin publik kanë sot të njëjtat paga që kishin edhe një vit më parë.
Të dhënat e INSTAT për nivelin e pagave mbështeten në të dhënat e Drejtorisë së Përgjithshme të Tatimeve mbi pagat e deklaruara nga bizneset dhe të vetëpunësuarit. Si të tilla, pagat nuk përfshijnë rastet kur bizneset punojnë me dy bilance ose kur bizneset u marrin të punësuarve një pjesë të rrogës pasi ia derdhin në bankë pagën minimale zyrtare. Shifra prej 54,149 lekësh përfshin pagën bruto, d.m.th., pagën neto që punëtorët marrin në dorë plus pjesa e sigurimeve që u mbahet punëmarrësve si dhe tatimi mbi të ardhurat personale.
Mes viteve 2014 dhe 2019, ritmi vjetor i rritjes së pagave në sektorin privat ka qenë 2.4% ndërsa pagat në sektorin publik janë rritur me 3.5% dhe paga minimale zyrtare është rritur me 3.3%.
Paga e sektorit publik ishte mesatarisht 63,400 lekë në tremujorin e dytë, ose 28% më të larta se sa në sektorin privat.
Sipas INSTAT, nga të 45 mijë personat e dalë nga numri i të punësuarve, rreth 1,500 u klasifikuan si të papunë të regjistruar ndërsa pjesa tjetër u klasifikuan si popullsi inaktive. /BIRN/
