Gjithçka po ecte mirë: Bayern Mynih e nisi sezonin me tetë fitore radhazi nën drejtimin e teknikut Carlo Ancelotti. Por kjo është pjesë e së shkuarës.
Dje, në Frankfurt, bavarezët për të tretën herë radhazi nuk arritën të fitonin në Bundesligë, teksa u ndalën në barazim 2-2. Duke shtuar edhe humbjen 1-0 me Atletico Madrid-in në Champions League, rekordmenët kanë katër ndeshje që nuk e shijojnë 3-pikëshin.
Kjo nuk mund të durohet nga hierarkia e klubit. Kryetari i bordit mbikëqyrës, Karl-Heinz Rummenigge, qe shumë i ashpër me deklaratën e tij pas ndeshjes, ashtu si edhe italiani Ancelotti dhe kapiteni Philipp Lahm. “Ky nuk ishte Bayern Mynih”, – tha Rummenigge. Ai e kishte fjalën sidomos për pjesën e parë, në të cilin Ancelotti deklaroi se skuadra e tij fjeti gjumë për 45′.
“Kjo është diçka që nuk e kemi kaluar shpesh. Duhet të jemi të kënaqur që morëm një pikë. Në fushë duhet të futesh me një qëndrim krejt tjetër!” – shtoi Rummenigge.
