Gjykata e Durrësit ka liruar nga qelia një të arrestuar për veprën penale “heqja e paligjshme e lirisë”. Ndaj F. Kolajt, u vendos masa e sigurisë detyrim paraqitje, duke e lënë të lirë pas arrestimit më 4 Gusht, në Durrës.
Personi nën hetim, në bashkëpunim me disa të tjerë, akuzohet se ka grabitur e goditur D. Xhafan, me të cilin kishte njohje.
Në deklarimin e tij, Kolaj është shprehur se e kishte kryer aktin pasi i treguan se D. Xhafa fshihej pas një skeme mashtrimi financiar, pre e së cilës kishte rënë vetë F. Kolaj.
Hetimet
Referuar dosjes hetimore: rezulton se viktima e veprës penale D. Xhafa ka paraqitur kallëzim penal ndaj shtetasit F. Kolaj. Ai ka shpjeguar se në datë 2 Mars ka ardhur në qytetin e Durrësit, me makinën e tij tip “Mercedez Benz SLK”, me qëllim për të takuar një të njohurin e tij F. Kolaj, të cilin e njeh prej vitesh. Kanë lënë takimin me F. Kolaj në Plazh, tek Iliria, tek një dyqan berberi. Ata janë takuar rreth orës 21:30 dhe pasi ka parkuar makinën e tij është afruar dhe futur në makinën e F. Kolaj dhe së bashku me të kanë filluar të lëvizin në Durrës.
F.Kolaj i ka thënë se do takonin dy shoqe dhe së bashku me to do të shkonin për darkë. Me pas, shtetasi F. Kolaj ka ndaluar automjetin në një rrugë pa ndriçim, pranë një ndërtese të vjetër dhe nga një çantë ka nxjerrë një pistoletë të cilën ia ka drejtuar D. Xhafas, duke e kërcënuar.
Më pas, afër makinës janë afruar disa tre persona të cilët kanë hapur dyert e makinës dhe janë futur brenda, ndërsa dy të tjerë kanë ndenjur jashtë. Personat që kanë hipur në makinë kanë filluar ta godasin kallëzuesin e veprës penale, duke i këputur një varëse floriri që e kishte në qafë si dhe i kanë marrë një shumë të hollash prej 3000 euro.
Pas kësaj, F. Kolaj e ka çuar te makina e tij dhe më pas është larguar së bashku me mjetin në drejtim të qytetit të Tiranës, duke vajtur në një farmaci dhe marrë qetësues.
Rrëfimi
Është pyetur shtetasi F. Kolaj i cili ka pranuar se është njohur para rreth një viti me shtetasin D. Xhafa. Pasi është njohur me të kanë filluar ti vijnë ftesa në rrjetet sociale nga femra të ndryshme të cilat i kanë kërkuar para dhe ai ua ka çuar nëpërmjet Wester Union.
Kur është kthyer në Shqipëri ka kërkuar ti takojë këto vajza, por ato i kanë bllokuar çdo lloj komunikimi. Para disa ditësh, ka takuar dajën e shtetasit D. Xhafa i cili i ka thënë se këto femra i ka përgatitur vetë D. Xhafas për ti marrë paratë.
Më pas ai ka komunikuar me D. Xhafa duke lënë takim në Durrës dhe pasi janë takuar janë konfliktuar duke i këputur varësen. Është bërë këqyrja e shtetasit D. Xhafa duke evidentuar dëmtimet që i janë shkaktuar.
Në rrethanat si më sipër, në datë 4 Gusht 2020 është bërë arrestimi në flagrancë i personit nën hetim F. Kolaj.
/BN/
