Në kaosin e arbitrimit në ndeshjen Flamurtari-Bylis të dielën, kaloi ndoshta pa vënë re mirë një episod në minutën e 70-të, kur Flamurtari kërkoi një penallti për një faull në kufirin e zonës.
Përtej diskutimit nëse ishte penallti apo faull (gjyqtari e dha faull jashtë zone, mes protestave vlonjate), ka rënë në sy gafa e arbitrit dhe anësorit që duhej ta ndihmonte. Siç mund të shihni në video, faullin e shkaktoi Ledion Muçaj, i cili kishte marrë edhe një karton të verdhë në fillim të ndeshjes, ndaj duhej të dilte me karton të kuq.
Muçaj u largua me shpejtësi dhe arbitri kërkon lojtarin që duhet të ndëshkojë, ndaj tek ai shkon Peposhi duke protestuar. Duke menduar se Peposhi shkaktoi faullin, arbitri i jep atij karton të verdhë, që ishte i dyti edhe për të, ndaj automatikisht ishte i kuq.
Lojtarët e Bylisit protestojnë dhe i kërkojnë anësorit të sqarojë kryesorin. Ajo ndodh, anësori i thotë që faullin nuk e kreu Peposhi, por në mënyrë të pabesueshme, nuk i thotë kush e shkaktoi faullin.
Arbitri sërish kërkon lojtarin që duhet të ndëshkojë dhe aty del Simiç dhe i thotë që e kreu ai, duke marrë ai kartonin e verdhë. Situatë tragjikomike, aq sa lojtarët e Flamurtarit nuk dinin ku të protestonin e Lushtaku nuk di ç’të bëjë më, veçse të qeshë.
