Plot 38 persona, të akuzuar për dhunë ndaj policisë gjatë protestës opozitare të 13 prillit 2019 para Kryeministrisë dhe Parlamentit, së fundmi, u deklaruan fajtorë dhe u dënuan nga Gjykata e Tiranës për “kundërshtim të punonjësve të policisë”.
Sot, më shumë se një vit nga protestuat e organizuara nga opozita, e cila kërkoi largimin e Ramës nga drejtimi i qeverisë, protestuesit vijnë të ‘përndiqen’.
Burime pranë Partisë Demokratike bënë me dije se këtë të Mërkurë, 43 personave, pjesëmarrës në protestuat e opozitës vitin e kaluar, u është njoftuar së fundmi ngritja e akuzës së kundërshtimit të forcave të policisë. Të njëjtat burime shtuan se bëhet fjalë për protestues nga qytete të ndryshme, të cilët kanë marrë pjesë në protestuat e organizuara nga opozita vitin e kaluar dhe që janë shoqëruar disa herë në polici pas tubimeve.
Në shkurt të vitit të kaluar, opozita dogji mandatet parlamentare dhe zbriti në rrugë. Disa protesta u organizuan, ku nuk munguan dhe përplasjet me forcat e rendit. Të tjera u zhvilluan në mënyrë paqësore. Qëllimi i opozitës megjithzatë, për të shkuar të zgjedhje të parakohshme pa Edi Ramën kryeministër nuk u realizua. Tanimë, në një kohë kur tubimet janë ndaluar nga autoritetet për shkak të rregullave për parandalimin e Covid, duket se do të jenë qytetarët që do të vendosin në zgjedhjet e vitit 2021 nëse do të ketë rotacion pushteti.
Raportimet mediatike flasin për dy data të mundshme, 9 maji dhe 18 prilli.
