Gjykata e Krimeve të Rënda i ka kërkuar prokurorisë të kryejë ekspertizën e GPS-it të makinës së Denis Shtrazës, autorit të dyshuar për rrëmbimin dhe vrasjen e Gazmend Çollakut në Durrës, i cili u gjet i lidhur me një plumb në kokë.
Ekspertiza e GPS do të përcaktojë lëvizjet e tij ditën e rrëmbimit të Collakut. Kjo ishte edhe arsyeja që gjykata, nuk pranoi t’i ndryshoi masën e sigurisë Denis Shtrazës, edhe pse qelizat e telefonit nuk tregojnë se i dyshuari ka kaluar në zonën ku ka ndodh rrëmbimi i Çollakut.
Denis Shtraza vazhdon të këmbëngulë se është i pafajshëm për rastin në fjalë, por prokuroria dyshon se është njëri nga personat që ka marrë pjesë në rrëmbim dhe më pas vrasjen e Çollakut. Por, deri tani nuk ka ndonjë provë konkrete që implikon në këtë ngjarje.
Shtraza mbahet ne burg që prej janarit të këtij viti kohe kur ndodhi vrasja. Për këtë vrasje është shpallur në kërkim dhe ish-oficeri i policisë Ervin Dalipaj.
