Qeveria shqiptare nuk ka bërë asnjë rezervim vaksine, por po sheh disa opsione të cilat që të gjitha synojnë prioritet për vaksinimin e deri 20 për qind të popullsisë së vendit.
Pohimi vjen nga Silva Bino, shefja e Departamentit të Epidemiologjisë pranë ISHP. Por më herët z.Rama para pak ditësh tha se “kemi bërë edhe një rezervim për vaksinën kur të dalë, dhe ajo është një histori në vete që do e shohim në proces si vijon”.
Silva Bino, thotë se janë vetëm duke shqyrtuar tre opsione të mundshme për të porositur vaksinën.
“Shqipëria ka disa opsione; një opsion është COVAX e cila është një lloj partnershipi midis disa partnerëve ndërkombëtarë dhe vendeve të ndryshme. Duke bërë këtë marrëveshje, ti arrin që të paguash fillimisht një shumë më të pakët për një numër të caktuar dozash dhe për të mbuluar një përqindje të caktuar të popullatës.
Opsion tjetër është një marrëveshje me ndonjë vend të BE, i cili e siguron vaksinën me marrëveshje bilaterale. Dhe pastaj është duke u parë opsioni tjetër nëpërmjet BE-së”, u shpreh Silva Bino, shefe e Departamentit të Epidemiologjisë.
Por kush do ta marrë vaksinën pasi ajo të dalë? Bino thotë se vaksina kundër COVID-19 si fillim është menduar që të mbulojë vetëm një pjesë të popullatës.
Sipas saj, prioritet do të kenë personat me diabet, me sëmundje kardiovaskulare, të mushkërive si dhe personat mbi 70 vjeç.
“Së pari mendohet që të merret mbulesa për 20% të popullatës dhe pastaj kjo do të vazhdojë gradualisht”.
Bino bën edhe një sqarim: “Vaksinimi kundër COVID-19 nuk është i detyruar, sepse është një vaksinë mbështetur në informacionin që njerëzit do të marrin dhe do të jetë në vendimin e tyre se çfarë do të duan të bëjnë. Neve, në të gjitha iniciativat që po ndërmerr qeveria është fakt se po përpiqet që të sigurojë këto vaksina falas”, u shpreh znj. Bino.
Sa i përket kufizimit apo jo të lëvizjeve nëse do të kemi një shtim të mëtejshëm të personave të prekur me COVID-19, znj. Bino tha se ky vendim do të jetë në varësi të situatës, megjithatë vende të ndryshme po aplikojnë izolime të pjesshme brenda vendit.
“Shumë vende aplikojnë izolim për qytete të ndryshme, për zona të ndryshme dhe natyrisht edhe për qendra pune, ne kemi vepruar gjatë kësaj kohe, janë izolime që quhen të pjesshme”, tha shefja e Departamentit të Epidemiologjisë.
