Policia e Tiranës vijon ta quajë si vetvrasje vdekjen e të riut Besnik Pudja i cili më 7 tetor u gjet me një plumb në kokë.
Krahas kësaj policia në njoftimin për shtyp konfirmon se ai merrej me kultivimin e hashashit. Ditën e djeshme prokuroria e Tiranës ka hedhur dyshime të forta për vdekjen e të riut ku në dosjen e saj thuhet se viktima ishte qëlluar me plumb pas koke, çka tregon një vrasje.
Ditën e djeshme policia e Tiranës ka arrestuar dy persona të cilët dyshohet të kenë dijeni mbi ngjarjen. Më konkretisht gjatë ditës së djeshme u vunë në praga Alges Liçi, 19 vjeç dhe Dritan Buzo, 30 vjeç, banues në Tiranë, i dënuar më parë.
Krahas tyre u bë shpallja në kërkim i shtetasit, H. D., 47 vjeç, banues në Tiranë.
Në një njoftim zyrtar të policisë thuhet se ata kanë qenë bashkë me viktimën në vendin ku ai kreu vetëvrasje dhe janë larguar pa e raportuar më parë në sallën operative. Madje, njëri prej të ndaluarve është i plagosur me një plumb në shpatull. Të njëjtat burime thanë se ai është qëlluar nga i njëjti plumb që vrau 36- vjeçarin.
Edhe vetë i ndaluari e ka shpjeguar në këtë formë plagosjen e tij, duke shpjeguar edhe rrethanat se si ka ndodhur ngjarja, por edhe faktin se përse ndodhej aty natën e krimit. Megjithëse tregohen shumë të rezervuar në lidhje me informacionet rreth ngjarjes, burimet pranojnë se objekti ku u gjet i vetëvrarë Besnik Pudja, ishte në ndërtim e sipër dhe nuk përjashtohet mundësia që mund të përdorej si magazinë për bimë narkotike. Këtë e kanë pohuar para oficerëve të Policisë edhe dy të ndaluarit, që po kërkoheshin prej më shumë se 3 ditësh në malet e Shëngjergjit. Ata kanë pohuar se ndodheshin aty, pasi i kishte thirrur Besnik Pudja, për të ndërtuar magazinën, por pa e përcaktuar se për çfarë do të përdorej.
Policia pranon se viktima merrej me kultivimin e lëndëve narkotike ndërsa në njoftimin e kësaj të premteje i akuzon dy të rinjtë se tentuan të fshihnin ngjarjen.
